Tinugutan kan Sandiganbayan Second Division an pagbawi kan mosyon ni Senador Jinggoy Estrada na naghahagad nin furlough o temporaryong pagluwas sa kulungan tanganing makaatinder sa Impeachment Trial ni Vice President Sara Duterte.
Huli digdi, binawi na kan korte an dating kasuguan na nagsusugo sa prosekusyon na magsumitir nin komento, asin idineklarar ini bilang moot and academic. Segun sa manifestation na isinumitir kan kampo ni Estrada, nagkaigwa nin sala sa pagsumitir kan mosyon huli ta naipadara ini sa Second Division imbes na sa Fifth Division kan Sandiganbayan.
An Fifth Division an may hurisdiksyon sa saiyang pagkakaditine huli ta sinda an nagkakapot kan saiyang non-bailable na kasong plunder na may koneksyon sa anomalya sa mga flood control projects.
Maski nakapagpiyansa na si Estrada nin ₱90,000 para sa suway na kasong graft na nasa Second Division, nagtitiner ining nakaditini sa New Quezon City Jail sa Payatas huli sa kasong plunder na kinakaputan kan Fifth Division.Presenteng nagsasairarom si Estrada sa 90-day preventive suspension na ipinautob kan Senado poon kan Hunyo 22.
Segun sa liderato kan Senado, an suspensiyon niya komo Senador nangangahulugan man na dae siya puwedeng maglingkod komo Senator-Judge sa nagpapadagos na impeachment trial ni VP Sara Duterte sagkod na ipinapautob an nasabing kasuguan.
