Posible pang lalo na magluya an kantidad kan piso asin magpakol sa P63 kada dolyar sa masusunod na mga bulan huli sa liwat na pagtindi kan tensyon sa Midddle East asin piglalaoma an paglangkaw kan demand sa mga inaangkat na produkto, segun yan sa BMI, sarong yunit kan Fitch Solutions.
Segun sa report,piglalaoman na makawat an piso sa pag-ultanan kan P61 hasta P63 kada dolyar asin posibleng magsara an taon sa P61 kada dolyar kun magbaba an presyo kan langis asin magdakul an remittances kan mga OFW.
Sinabi kan BMI na nakakadugang sa pagluya kan piso an paglangkaw kan pangkinaban na presyo kan langis, huli sa an Pilipinas nag-aangkat kan kadaklan nin suplay kan fuel. Huli digdi, naglalangkaw an import bill asin lalo pang nagdadakul an trade deficit.
Dugang pa kaini, nagtitiner na maluya an paglaog kan Foreign Direct Investments (FDI), mantang piglalaoman man na mapadagos an kusog kan US dollar huli sa posibleng dugang na paglangkaw kan interest rates sa Estados Unidos.
Piglalaoman na bahagyang makusog an piso antes matapos an 2026 huli sa pagdakul kan remittances sa huring parte kan taon.
Nagpatanid an BMI na posibleng magtiner na maluya an piso sagkod sa 2027 huli sa makusog na mga hamon sa pangkinaban na merkado asin sa maluyang na paglaog kan mga pamumuhunan.
