Arestado an Apat na indibidwal kan mga personahes kan Police Station 4 sa ginibong Anti-Illegal Gambling Operation sa Barangay Pacol, Ciudad nin Naga kan Hulyo 24, 2026.
An mga suspek na binistong sinda “Eva,” 32 anyos; “Shie,” 38; “Gen,” 31; asin si “Rick,” 45, gabos residente kan Baranga. Pacol, Ciudad nin Naga, naaktuhan na nagkakawat nin iligal na bingo.
Nakumpiskar sa lugar kan operasyon an 88 pidaso nin bingo cards, sarong (1) itom na Vivo Y11 cellular phone, 309 na sinsilyo na nagkakantidad nin 25 centavos kada saro, apat (4) na 50pesos na papel de bangko, sarong (1) papel na 100 pesos, sarong (1) sinsilyong 10 pesos, asin apat (4) na 20 pesos na sinsilyo an pigtutubodan na ginamit sa pagsugal.
An mga nadakop na suspechado pinaaram an rason kan saindang pagkadakop asin an saindang mga deretso sa tataramon na saindang nasasabotan. Sa ngunian, yaon sinda sa kustodiya kan Police Station 4 asin nahahampang sa kasong pagbalga kan Presidential Decree No. 1602, as amended by Republic Act No. 9287.
Padagos an pagpakusog kan Naga City Police Office sa kampanya kontra sa gabos na klase nin iligal na sugal para mamantinir an kaayusan asin kaligtasan sa komunidad. Pig-eenkaminar man an publiko na makipagtabangan sa mga otoridad sa paagi kan pagreport kan anuman na iligal na aktibidad sa saindang lugar.
