Makukulong sa karsel an negosyanteng si Janet Lim Napoles matapos mapatunayan na guilty kan Sandiganbayan asin tawan nin magabat na sentensya katakod kan P50 million na ghost projects sa Luzon.
Si Napoles nasentensiyahan nin 20 taon na pagkapreso para sa kada counts nin malversation o total na 200 taon sa 10 counts, asin 15 taon na pagkapreso para sa lambang bilang nin graft o total na 150 taon sa 10 counts.
An dating Department of Agrarian Reform (DAR) Undersecretary na si Jerry Pacturan nasentensiahan man na may kaso na 10 counts nin Malversasyon of Public Funds sa paagi nin pagpalsipikar kan mga pampublikong dokumento. Nasentensiyahan siya nin 19 taon na pagkapreso sa kada kaso o 190 taon. Si Pacturan naabsuwelto sa kasong graft huli ta dai nakapag-akusar an prosekusyon. Si Napoles asin Pacturan pinamultahan man nin tig-P5-M sa kada count kan saindang kaso.
Segun sa piskalya, si Pacturan, kaidto DAR Undersecretary for Support Services, nagpirma nin 2011 memorandum of agreement (MOA) sa pag-ultanan kan 10 local government units asin 10 non-government organizations na soboot konektado ki Napoles.
Sinabi kan MOA na an lambang LGU dapat na mag-ako nin P5 milyon na kantidad nin mga input sa oma hale sa mga NGO. Alagad an proyekto dai nangyari. Sa korte, walong alkalde hale sa Bulacan, Batangas, Pangasinan asin Quezon an nagpatotoo na peke an saindang mga pirma sa surat na kahagadan para sa pondo.
