Nangapodan si Pangulong Ferdinand Marcos Jr. sa Kongreso na apurahon an pag-amyendar sa Electric Power Industry Reform Act (EPIRA) tanganing tuluyang mawara an System Loss Charge na ipinapasa sa mga consumer komo kabali kan saindang bulanan na bayad sa kuryente.
Sa saiyang ikalimang State of the Nation Address (SONA) kan Lunes, sinabi kan Presidente na malinaw sa gobyerno an pangapodan kan publiko na pababahon an presyo kan kuryente sa nasyon.
Segun ki PBBM, dae dapat ipinapasa sa mga Consumer an System Loss dahil mayo sindang pananagutan sa pagkawara kan kuryente mantang ini nag-aagi sa transmission asin Distribution System.
Huli digdi, sinabi kan Presidente an apuradong pag-amyendar sa EPIRA tanganing ipagbawal an paniningil nin System Loss sa mga consumer, kabali na an value-added tax (VAT) na ipinapataw kaini. An EPIRA o Republic Act No. 9136 an batas na nagreporma sa industriya kan kuryente kan 2001.
Sa irarom kanpresenteng mga probisyon kaini, pinapahintulutan an mga distribution utility na ipasa sa mga consumer an parte kan system loss na dulot kan technical losses asin man kan mga non-technical losses, arog kan iligal na koneksyon asin paghabon nin kuryente.
Apwera sa pag-amyendar sa EPIRA, hinikayat man ni PBBM an Kongreso na ipasa an panukalang “Sariling Kuryente Act,” na obhetong mapadali asin mapaabot sa mas dakul na tawo an pag-instalar nin Rooftop Solar Panels asin Battery Storage Systems sa mga harong.
Segun sa Chief Executive, makakatabang an panukalang batas tanganing magkaigwa nin mas dakul na alternatibong pagkukunan nin kuryente an mga Pilipino asin mabawasan an saindang gastos sa bayad sa kuryente.
