Kinumpirmar ni Bise Presidente Sara Duterte na mapadagos saaga, Hulyo 29 an pro-Duterte rally sa atubangan kan International Criminal Court (ICC) sa The Hague, Netherlands.
Sa sarong entrevista, pigbuyagyag kan Bise Presidente na nag-oorganisar nin “Free Duterte Now” rally an saiyang mga suportador sa ibang nasyon sa luwas kan hepatura kan ICC komo protesta sa paglilitis ki dating Presidente Rodrigo Duterte.
Inamin ni VP Sara sa saiyang pagbisita sa saiyang ama na sinabi kainiw na posibleng dai makatabang sa saiyang kaso an planong rally base sa mga nakaaging pangyayari kun sain ginamit kan ICC an saindang mga tataramon asin aksyon komo basehan kan saindang mga desisyon.
Alagad, sinabi kan Bise Presidente na ini an saindang paagi tanganing mailuwas an saindang kaanggotan. Sinaysay kaini na an dating Presidente dai nagkontra kaini.
Nagtao man nin update si VP Sara sa kamugtakan kan dating presidente asin kun ano an saindang pinag-olayan. Sinaysay kaini na “okay” an saiyang ama asin nagkaigwa sinda nin produktibong pag-olay asin an saindang oras ginamit sa mga kahaputan kan dating presidente manungod sa presenteng kamugtakan kan pulitika sa Pilipinas.
