Pig-eksplikar kan Bukluran ng Manggagawang Pilipino (BMP) President na si Atty. Luke Espiritu na ilegal an pagpaluwas kan Temporary Restraining Order (TRO) kan Regional Trial Court (RTC) kan Pasig na nagpupundo sa implementasyon kan P85 wage increase sa National Capital Region (NCR).
Sa intrevista kan Bombo Radyo Naga ki Espiritu, sinaysay kaini na an RTC sarong Court of General Jurisdiction na dapat patas sa pag-asikaso kan mga kaso na nasasakopan kaini. Alagad, igwa nin mga bagay arog kan mga kaso sa pagtrabaho na igwa nin espesyal na hurisdiksyon asin dai dapat dangugon kan mga ordinaryong korte huli ta kaipuhan kaini an teknikal na kaaraman, orog na sa mga bagay na may kinaaraman sa suweldo asin mga pamantayan sa pagtrabaho.
Susog ki Espiritu, an sarong huwes kan sarong Court of General Jurisdiction mayo nin supisyenteng espesyalisadong kaaraman sa mga indikasyon sa ekonomiya na ginagamit sa pagdeterminar kan maninigong paglangkaw kan sweldo, nin huli sinda nagdadangog sana sa mga ordinaryong kasong sibil. Huli kaini, nanindugan ini na malinaw na nakasurat sa Labor Code na dae dapat makiaram o magpaluwas nin TRO an mga ordinaryong korte sa siring na mga bagay.
Tinawang-duon man ni Espiritu na kinakaipuhan na ipaglaban kan mga obrero an saindang deretso dawa sa implementation phase kan ley. Sinabi pa kaini na an mga grupo nin mga obrero nag-aagi nin kadakol na proseso antes sinda makapagpetisyon sa Regional Tripartite Wages and Productivity Board, kabali na an pag-andam nin petisyon, pag-atendir nin mga hearing, pagsumiter nin position paper, asin pagtao nin mga argumento tanganing patunayan na an presenteng lebel nin sweldo bako nang sapat.
Tinawan duon man ni Espiritu na may mga negosyante na makusog an koneksyon, huli sinda an enot na nakikipag-olay sa Department of Labor and Employment (DOLE), sa Secretary of Labor, sagkod sa Senado. Nanindugan man ini na an saindang grupo dae inimbitaran ni Presidente Ferdinand “Bongbong” Marcos Jr. tanganing pag-olayan an mga isyung may kinaaraman sa karahayan asin kapakanan kan mga obrero.
