Sa ibong kan padagos na pag-umento sa presyo kan produktong petrolyo, ipapautob na sa banwaan nin Libmanan ngunian na bulan nin Agosto 2026 an bagong official fare matrix para sa mga tricycle-for-hire asin pedicab makalihis ining aprubaran kan Sangguniang Bayan.Sigon ki Mayor Edelson Marfil, an pagpautob kan bagong pamasahe nakadepende sa Municipal Ordinance No. 15, Series of 2026 asin bakong personal na desisyon kan alkalde. Nag-agi ini sa tamang proseso sa paagi kan ordinansa, kabali na an public hearing asin konsultasyon, antes ining dagusan na aprubaran kan Sangguniang Bayan. Sigon sa alkalde enot ng natukar an traffic code asin fare matrix kan ini konsehal pa sana alagad dai ini nakalusot sa third and final reading. Huli digdi, hinagad kaining i-update asin ipadagos an propuesto.
Bagong Pamasahe (Fare Matrix)
Para sa pedicab o padyak:
- Within Poblacion: ₱10.00; ₱8.00 para sa may discount
- Haraning ruta: ₱15.00; ₱12.00 para sa may discount
Mientrastanto, para sa tricycle-for-hire:
- Within Poblacion: ₱15.00; ₱12.00 para sa may discount
- Poblacion hanggang 1–3 kilometro: ₱20.00; ₱16.00 para sa may discount
- Poblacion hanggang 3–5 kilometro: ₱30.00; ₱24.00 para sa may discount
- 5 kilometro pataas: ₱40.00 + ₱5.00 kada dugang na kilometro
Igwa man nin dugang na ₱5.00 para sa mga mabiyahe tuyong bangui. An 20 porsiyentong discount para sa mga estudyante, senior citizen asin persons with disability (PWD) na may valid IDs.Mientrastanto, nagreklamo asin dai ini inuyunan kan nagkapirang tricycle operators alagad tinawan doon kan alkalde na an fare matrix dai basta-basta itinakda huli ta nag-agi ini sa Committee on Public Utility asin sa proseso kan Sangguniang Bayan antes na naging ordinansa. Obheto kaining magkaigwa nin malinaw asin transparent na batayan kan singil sa pamasahe asin tanganing maibitaran an dai pagkakaintindihan sa pag-ultanan kan pasahero asin kan driver. Pig-iinkaminar an mga pasahero na magsumbong enkaso singilon nin labi sa kantidad kan itinakdang pamasahe kan LGU asin pweding makipagkoordinar sa PSO-Libmanan tanganing tulos na maaksyunan an anuman na reklamo.
