Inakusaran ni Defense Secretary Gilberto Teodoro Jr. an China na naggagamit nin disinformation ngani na ibalyo an atensyon sa mayor na isyu kasunod kan pagkadakop kan mga Chinese nationals sa Pilipinas asin labi sa sanggatos na Pinoy sa China.
Sa sarong pahayag kan Sabado, Agosto 15, sinabi ni Teodoro na piglilikay kan Chinese Foreign Ministry an importanteng hapot kun imbuelto sa iligal na aktibidad an mga Chinese nationals na nadakop sa Pilipinas.
Sabi niya, “an simple asin malinaw na simbag iyo.”
Kabali suboot sa mga alegasyon kontra sa mga suspechado an paggamit o pagproseso nin substandard asin radioactive-contaminated steel, pag-apon nin maating tubig sa mga salog, asin pagpaluwas nin nakakahilo na aso.
Sigon ki Teodoro, suportado an mga alegasyon kan “irrefutable evidence” na natipon sa paagi kan mga search warrant na ipinaluwas kan mga korte sa Pilipinas.
Inakusaran man kaini an nagkapirang opisyal kan Embahada kan Tsina na nakikiaram sa mga lokal na pagpapaotob kan ley asin nagbabanta nin pagbalos sa mga Pilipino.
Kasunod ini kan anunsyo kan China na nagkondusir na ini nin operasyon laban sa labi 100 na mga Pinoy huli sa suboot iligal na pagtrabaho asin pag-estar.
Alagad, nanindugan si Teodoro na an mga Chinese nationals na nadakop sa Pilipinas bako sanang mga ordinaryong trabahador, kundi iyo suboot an mayor na operator kan iligal na negosyo.
Sinabi man kaini na mas nakatutok an China sa mga isyung visa asin pasaporte kan mga suspechado kaysa sa mga alegasyon manungod sa saindang iligal na aktibidad.
Sa ibong na lado, pinahimutikan ni Teodoro an suboot pagprobar kan China na i-link an kaso kan mga Pinoy sa China sa mga operasyon kan ley kan Pilipinas.
Inapod niya an pinakabagong pahayag kan Chinese Foreign Ministry laban saiya na “classic squid tactic” o an paggamit nin disinformation sa paagi nin paglikay sa mayor na isyu.
