Naglangkaw nin 18% an koleksyon kan gobyerno sa taripa hale sa imported na bagas poon Enero sagkod Hulyo ngonian na taon, na uminabot sa P12.8 bilyones. Segun sa Bureau of Customs (BOC), haros P2 bilyon an halangkaw kaini kumpara sa P10.78-B na nakolekta sa kaparehong peryodo kan nakaaging taon.
Pinakahalangkaw an koleksyon kan BOC kan Hulyo, na uminabot sa haros P2.2-B o haros doble sa P1.12-B na nakolekta kan Hulyo kan nakaaging taon. Sa laog nin pitong bulan, an total na volume kan imported na bagas nag-abot sa 3.42-M na metriko tonelada, labi sa un-kuarto na mas halangkaw kisa sa 2.69-M na metriko tonelada kan nakaaging taon.
Segun sa mga opisyal kan agrikultura, mas dakul na bagas an pig-aangkat tanganing magserbing buffer o reserba laban sa huma kan grabeng kondisyon kan panahon, kaiba na an El Niño, na posibleng makaapektar sa lokal na produksyon nin paroy. Mientrastanto, nagluluwas sa datus hale sa Bureau of Plant Industry na uminabot sa 931,646 metric tons an kantidad kan paroy na pig-apply kan mga qualified traders asin importers.
An paglangkaw kan koleksyon natabangan man kan pagbaba kan presyo kan bagas sa bilog na kinaban. Susog sa Food and Agriculture Organization of the United Nations, an average na presyo kan Vietnamese fragrant rice buminagsak nin anom na porsyento poon Enero sagkod Hulyo, na uminabot sa $457.30 kada metriko tonelada. Ini an nagin dahilan kan pag-importar nin bagas hale sa ibang nasyon na mas nakakaakit sa mga importer.
Mientrastanto, sinabi kan BOC na nakakontribwir man sa halangkaw na koleksyon an pagluya kan piso kumpara sa dolyar. An average exchange rate na ginamit sa imported na bagas poon Enero hasta Hulyo P60.10 kada dolyar, kumpara sa P57.08 kan kaparehong periodo kan nakaaging taon. Importante an pagkolekta nin taripa nin huli ta ini an mayor na pinaghahalean nin fondo para sa Rice Competitiveness Enhancement Fund, na nag-aalokar nin garantisadong P30-M para sa pag-uswag asin modernisasyon kan lokal na industriya nin paroy.
