Pigrerepaso na kan Malacañang kun arin sa 13,917 na flood control projects na pig-implementar kan nakaaging administrasyon an bakong epektibo sa pagpugol sa pagbaha.
Ini an simbag ni Palace Press Officer USec. Claire Castro may relasyon kun na-assess na kan Malacañang an mga flood control projects na dae nagpupunsionar kasunod kan mahiwas na pagbaha na naeksperyensiyahan kasuodma sa Metro Manila.
Segun sa USec. Castro, hinahalat ninda an report asin datos hale sa DPWH kun haen an mga proyekto, kun nag-function na, asin kun iguang ghost o substandard na mga proyecto.
Sinambit ni Castro an pumping station kan Sunog Apog bilang sarong proyekto na dating maluya an pagkagibo alagad naayos na asin nag-operar na makalihis an interbensyon asin paghirahay.
Tinawang-duon ni Castro na kinakaipuhan na magtarabangan an gobyerno asin an publiko para masimbagan an problema sa pagbaha.
An mga proyekto kan DPWH padagos na nagtutukar kan mga kakulangan sa drainage, pumping stations, asin mga agihan nin tubig.
Alagad, an mga ini nagigin bakong epektibo kun an basura padagos na itinatapok sa mga estuary asin agihan nin tubig.
