Pig-inagurar an sarong Motorist Assistance Center sa banwaan nin Lupi asin Border Security Control Point sa banwaan nin Bato, Camarines Sur kan, Agosto 18, 2026.
Pinangenotan Police Regional Office (PRO) 5 Regional Dir. PBGen. Erosito Miranda an pagbendisyon, inagurasyon asin turnover kan mga nasabing pasilidad.
Enot na ginibo an inagurasyon asin pagbendisyon kan Bato Border Security Control Point sa barangay Agos, Bato, Camarines Sur na pigpartisiparan kan Camarines Sur Police Provincial Office (CSPPO) Officer-in-Charge PCol. Tyrone Dotimas, Chiefs of Police sa 5th District asin Bato Mayor Enric Dancalan.
An bagong border security control point na ini iyo an maserbing dagdag na imprastraktura sa seguridad sa Camarines Sur na may katuyuhan na mapakusog an police visibility, monitoring asin coordination siring man maseguro an mas marikas na pagresponde kan mga pulis sa linderos kan probinsya.
Makalihis kaini, tulos man na nagpasiring an mga pulis sa Barangay Poblacion, Lupi para sa inagurasyon kan Lupi Motorist Assistance Center.
Yaon man an presensya ninda PBGen. Miranda, PCol. Dotimas, Lupi Mayor Christopher Jacinto, NAPOLCOM Assistant Regional Dir. Si Atty. Louie Toldanes, Chiefs of Police sa 1st District kan Camarines Sur asin iba pang mga yunit kan pulis.
An Motorist Assistance Center na ini, na pigmukna sa banwaan nin Lupi, may katuyuhan na matawan nin mas marikas na access an mga motorista, travelers asin commuters para sa anuman na asistensya hale sa kapulisan, lalo na sa panahon nin emerhensya asin iba pang sitwasyon.
Piglalaoman na mas mapagayon an police visibility nin huli sa pasilidad na ini, mantang nagtatao man tulos nin asistensya, seguridad, asin giya sa mga motorista na nag-aagi sa banwaan nin Lupi asin pagtaraid na banwaan.
