Nagpadagos ngonian na ika-34ng aldaw kan impeachment trial an pagsusuri sa mga rekord kan pinansyal ninda Vice President Sara Duterte asin kan saiyang agom na si Atty. Mans Carpio matapos iprisentar kan Anti-Money Laundering Council (AMLC) an kabilugan na summary kan saindang mga bangko.
Piglalaoman na ipagpapadagos ni Defense Atty. Mark Vinluan an saiyang cross examination sa saksi.
Naroromdoman na pinurbaran kan kampo kan depensa na ipagbawal an pagtestigo ni AMLC Executive Director Ronel Buenaventura huli sa bank secrecy laws, alagad isinantabi ni Presiding Officer Chiz Escudero an mosyon base sa probisyon kan Republic Act No. 1405 asin sa nagin precedent sa impeachment trial ni dating Chief Justice Renato Corona.
Kinontra man ni Senator-Judge Imee Marcos an pagpapahiling kan mga foreign currency account kan duwa, alagad ibinasura man ini ni Escudero tanganing magdanay an mga dokumento bilang ebidensya.
Sa report na isinumite ni Buenaventura, uminabot sa P4.4 bilyon an kabilugan na covered asin suspicious transactions na direktang nakalista sa mga bank account kan mag-agom, apwera pa sa P4.5 bilyon na naglaog sa 15 korporasyon kun sain igwa sinda nin mga business interest.
Kaiba sa mga narekord kan AMLC an sarong dakulang transaksyon kan Marso 28, 2014 kun sain nakaresibe nin P193,705,615.88 an joint account ni Sara Duterte asin kan saiyang ama na si dating Pangulong Rodrigo Duterte.
Apwera digdi, kinumpirma man kan AMLC na nakaresibe an negosyo ni Carpio na CALE88 Foods Corp. nin P319,326,770.41 na pondo hale sa mainland China asin Hong Kong.
Mientrastanto, nagpatanid si Atty. Vinluan na igwang katumbas na pananagutang kriminal an pagluwas kan mga confidential na rekord kan AMLC, na tulos man kinontra ninda Senator-Judges Raffy Tulfo, Kiko Pangilinan, Tito Sotto, asin Risa Hontiveros.
Nag-init an pagribayan nin tataramon sa pagultanan kan mga abogado kan akusaron ni Atty. Mae Divinagracia an depensa nin paggamit nin dilatory tactics matapos maghagad si Lead Defense Counsel Atty. Sheila Sison nin dugang na oras para surion an napakakapal na financial spreadsheets.
