Irinerekomenda ni Presidential Adviser on Cordillera Affairs, Assistant Secretary Antonio Tabora an paggamít nin tunneling method sa paggibo nin mga tinampo sa nasyon.
Huli ini sa dakol na kalamidad na pirming nangyayari sa Pilipinas, arog kan mga bagyo asin pagbaha, kun sain kadakol na kalsada an inaabot nin baha, naguguho, o natatamaan nin mga dakulang kahoy.
Segun ki Tabora, panahon na para ikonsiderar kan gobyerno an paggamít nin tunneling method sa paggibo nin mga kalsada, lalo na sa mga rehiyong bulubundukin.Nagtutubod an opisyal na magigin dakulang kaginhawahan ini sa mga lugar na prone sa rain-induced damage, dahil mas kadikit an maintenance na kakaipuhanon sa mga tunnel.
Segun digdi, ginagamit na kan ibang nasyon, arog kan Japan asin South Korea, an nasambitan na sistema, asin puwedeng sundon ini kan gobyerno kan Pilipinas.
Para ki Tabora, may sapat na kapasidad asin teknolohiya an nasyon tanganing maisagibo an nasambitan na sistema. Puwede man an Pilipinas na maggibo nin dagdag na kaaraman asin teknikal na suporta hale sa iba pang mga nasyon, kabali na an mga Southeast Asian asin Pacific Islander countries.
