Nagtapos sa ika-anom na pwesto an Philippine men’s artistic gymnastics team sa final kan kompetisyon nin 2026 Asian Games na ginibo sa Nagoya General Gymnasium sa Japan.
Sa pamamayo kan two-time Olympic gold medalist na si Carlos Edriel Yulo, nakakua an Pilipinas nin total na iskor na 227.359, na nagdara sa koponan sa ika-anom na pwesto, na nalampasan an Vietnam asin Singapore sa walong koponan na naglaban.
Marhay an naging kapinonan kan Team Pilipinas matapos makakua nin 38.099 sa rings asin 42.365 sa vault. Alagad, nagluya an saindang momentum sa parallel bars kun sain nakakua an koponan nin total na 36.099.
Nag-ambag sinda Juancho Miguel Besana nin 10.000, Karl Jahrel Eldrew Yulo nin 11.933, asin Carlos Yulo nin 14.166 sa nasabing event.
Sa horizontal bar, nakakua an Pilipinas nin 36.965 mantang nakatala man nin 38.199 sa floor exercise, kaiba an 14.266 ni Carlos Yulo.
Sa huring event na pommel horse, nagtapos an koponan na may 35.632, hale sa ambag ninda Zachary Nunez (12.333), Besana (11.933), asin Eldrew Yulo (11.366).
Mientrastanto, naghadi giraray an China matapos makua an ikatulong sunod na medalyang bulawan sa event, na nakakua nin total na iskor na 255.095.
Nakua man kan host country na Japan an silver sa iskor na 253.826, mantang bronze man an Chinese Taipei sa 239.896. Ika-apat an Kazakhstan (237.596) asin ika-lima an Republic of Korea (236.359).
