Nagtutubod an propesor sa political science na si Prof. Antonio Contreras na pauru-utro nang binalgar ni Senador Robin Padilla an mga reglamento kan Senate Impeachment Court, partikular na an Rule 18 o an sub judice rule.
Segun ki Contreras, nagin pirmi na an mga bayolasyon kan senador sa mga nakalihis na aldaw kan impeachment trial.
An propesor nagtao nin halimbawa sa ginibo ni Padilla kan Agosto 27, kun saen pigkonsiderar kaini na sobrang luwas sa linya an saiyang linya nin paghapot manungod sa paggamit nin mga alyas kan mga bayani kumpara sa paggamit nin mga alyas kan mga recipiente nin confidential funds, duwang bagay na dae daa pwedeng ikumparar sa tamang konteksto.
Dugang pa kan eksperto, garo theater of the absurd an interpelasyon kan senador asin imposibleng masabi kun gusto kaining magpangisi o magin romantiko sa tahaw kan seryosong pagbista.
Huli kaini, nangapodan si Contreras sa impeachment court na aksyonan an siring na gawi.
Sinabi niya na dapat mas maging estrikto an presiding judge na si Sen. Chiz Escudero asin gamiton an saiyang poder tanganing ideklarar na out of order an sisay man na senador-judge kun bako nang maninigo an saiyang sinasabi o ginigibo sa korte.
