An City Environment and Natural Resources Office o CENRO-Naga nagkondusir nin “Linig para ki Ina,” bilang parte kan preparasyon sa maabot na selebrasyon kan Peñafrancia Fiesta sa Ciudad nin Naga.
Sa Intrevista kan Bombo Radyo Naga ki Christopher Jhun D. Zantua, Senior Environmental Management Specialist kan CENRO-Naga, sinabi saiya na an City Clean-Up Drive na ginibo ni Naga City Mayor Leni Robredo, kun saen nagtiripon asin nagpartisipar an mga ahensya asin opisina kan ciudad, siring man mga grupo asin organisasyon.
Kaiba sa mga aktibidades an “Linig para ki Ina,” asin an Naga Rivers Maintenance, kun saen an katubigan sa Naga Rivers regular na piglilinig asin pigmamantenir.
Segun ki Zantua, taon-taon na piggigibo an mga nasabing aktibidad bilang parte kan pagpreparar asin pagpakusog kan selebrasyon kan Peñafrancia Fiesta. An pagmantenir kan kalinigan kan ciudad asin kan katubigan piglalaoman na makakatabang na magin mas areglado, makolor, asin arog kaiyan an selebrasyon na inaabangan kan mga taga-Naga asin mga bisita hale sa manlaen-laen na lugar.
Labi sa 3,000 na mga empleyado hale sa Naga City Hall an nagpartisipar sa nasambitan ng clean-up drive, kabale an mga estudyanteng enroll sa National Service Training Program o NSTP hale sa mga eskwelahan arog kan BISCAST asin Naga College.
Sa kabilogan, pigkakarkulong maabot sa 8,000 hasta 10,000 katawo an nagpartisipar sa nasabing aktibidad.
Mientrastanto, an Solid Waste Management Office an responsable sa pagkolekta kan mga basura, kun saen pigkakarkulong maabot sa tolong tonelada an total na nakolekta na basura.
Nangapudan man si Zantua sa mga bisita na mag-abot sa Naga, lalo na an mga parasimba, na magin responsable sa pag-asikaso kan mga basura. An basura dapat iapon sa tamang basurahan, asin kun mayo nin basurahan sa lugar, ilaag muna ini sa bulsa sagkod na makakua nin tamang pag-apon.
Tinawan duon man ni Zantua an kahalagahan kan disiplina asin responsableng pag-ataman sa kapalibutan.
Sa simpleng paggibo nin tama, an gabos makakatabang sa pagmantenir kan kalinigan kan ciudad asin mas makakaselebrar an gabos sa maabot na Peñafrancia Festival.
