Matrayumpo naidistrebwer sa mga pampublikong eskwelahan sa East at West District ng bayan ng Pili, Camarines Sur ang mga flat-screen television set na donasyon kan lokal na gobyerno komo dugang na suporta sa mga estudyante sa saindang pag-adal.
Sa intrevista kan Bombo Radyo Naga ki Mayor Marivic Solano, alkalde kan Pili, sinabi niya na nasa 153 na telebisyon an kabilogan an idodonar kan lokal na gobyerno sa mga pampublikong paaralan sa banwaan.
An programa ini, na obhetong makatabang sa mga estudyante sa saindang pag-adal, partikular sa pagbasa, an inirekomendar ni PSDS District Supervisor Dr. Cyril Salazar asin tulos na sinuportahan kan alkalde asin kan mga miyembro kan Sangguniang Bayan.
Obheto kan programa na mas pakusugon pa an sektor kan edukasyon paagi sa pagtao nin mga kagamitan na makakatabang sa mga kaakian sa saindang pag-adal.
Pangenot na benepisyaryo kan mga television set an mga Kinder asin Grade 2 students, pati an nagkapirang high school students. Sa masunod na taon, may nakatalaan man na mga television set para sa mga Grade 3 students.
Padagos na itinutulod ni Mayor Solano an pagkakaigwa nin marhay, makabago asin mas inklusibong sistema nin edukasyon para sa lambang estudyanteng Piliño.
Mientrastanto, sa mismong pag-deliver kan mga television set sa mga eskwelahan, nasaksihan kan alkalde an kakulangan nin mga tukawan sa nagkapirang paaralan. An iba man sa mga existing na tukawan an raraot na huli sa kahaluyang panahon.
Huli kaini, apwera sa mga television set, nagpromesa si Mayor Solano na magdodonate pa nin mga tukawan sa mga eskwelahan na labi na nangangaipo kaini, tanganing mas komportable asin mas marahay an pag-adal kan mga estudyante.
