Posibleng magkaigwa nin negatibong epekto sa mga botante an proponidong limang taon na extension kan termino para sa mga Barangay asin Sangguniang Kabataan (SK) officials.
Sa intrevista kan Bombo Radyo Naga ki Atty. Jerico Angelo P. Galvez – Election Lawyer, sinaysay kaini na importante an regular na pirilian huli ta nagtatao ini nin pagkakataon sa mga namamanwaan na kumpirmaron o salidahan an saindang mga lider base sa saindang performance. Sinabi niya na kun mapalawig pa an termino, kaipuhan man na maghalat nin mas halawig an mga botante antes na salidahan an mga opisyal na dae nag-perform nin marhay.
Mantang an limang taon na termino posibleng magtao nin mas dakol na panahon sa pag-implementar nin mga programa, sinabi ni Galvez na dai dapat baliwalaon an papel kan eleksyon bilang mekanismo para sa accountability asin pagbabago sa lokal na gobyerno.
Sinabi man kaini na bako supisyenteng rason an pagtipid sa gastos kan gobyerno tanganing ipagpaliban an pirilian. Segun saiya, nagpreparar na an Commission on Elections (Comelec) para sa nakatalaan na pirilian sa barangay asin SK, kun kaya posibleng masayang an ginibong preparasyon kun biglang ipagpaliban.
Mientrastanto, piglinaw man ni Galvez na sagkod na magin ley an term extension bill, magpapadagos an presenteng preparasyon para sa pirilian. Inenkaminar man kaini an mga botante na magin kritikal asin magpili nin mga lideres na tunay na boot magserbi sa saindang komunidad.
