Kinundusir sa banwaan nin Pasacao, Camarines Sur an One-Stop-Shop Service Caravan para sa mga dating rebelde, na may katuyuhan na irani sa saindang mga benepisyaryo an mga programa asin serbisyo kan gobyerno.
Sa intrevista kan Bombo Radyo Naga ki LTCOL Esteban Mangabat, Commanding Officer kan Sandigan, 9th Infantry Division, Philippine Army, sinabi kaini na umabot sa 32 an mga dating rebelde asin dating tagasuporta kan armadong grupo na naabot kan programa sa Pasacao.
Susog ki Mangabat, kaiba sa mga serbisyong ipinakilala sa mga benepisyaryo an mga programa hale sa mga lokal na gobyerno asin iba pang ahensya, kaiba an DSWD, PESO, NHA, DILG asin Philippine Coconut Authority, tanganing matabangan sinda sa saindang pangangaipuhan sa kabuhayan.
Dugang pa kaini, bako sana an pagtao nin pinansyal na asistensya an katuyuhan kan aktibidad, kundi an pagbilog asin pagpaparehistro man nin sarong lehitimong organisasyon o kooperatiba kan mga dating rebelde, tanganing magkaigwa nin sustenableng kabuhayan asin mas maayos na pagpadara kan saindang mga proyekto.
Kaiba man sa mga inisyatiba an pakikipagkoordinar sa Technical Education and Skills Development Authority o TESDA para sa mga pagsasanay sa kabuhayan. Sa banwaan nin Libmanan, 15 na dating rebelde na an nakatapos sa sarong bulan na pagsasanay sa organic farming, na angay sa kadaklan sa sainda na may kasanayan sa pag-uma.
Mientrastanto, padagos na minomonitor kan militar an mga organisasyon asin an saindang mga panukalang proyekto tanganing masiguro an kaangayan kan mga ini sa mga programa kan gobyerno asin an posibleng pagpondo hale sa mga ahensya o pribadong sektor.
Nag-apelar si LTCOL Mangabat sa iba pang kasapi kan armadong grupo na ikonsiderar an pagbalik sa gobyerno, asin nagtao nin pangapudan na makipagkoordinar sa Militar, mga lokal na gobyerno asin iba pang ahensya para sa saindang pagbabagong-buhay asin pagbalik sa komunidad.
