Naghahagad nin total na P10 bilyon an National Electrification Administration (NEA) na panukalang pondo para sa taon 2027, kun saen an P3 bilyon kaini itatagama para sa line enhancement asin an P7 bilyon man para sa dugang na pondo sa loan equity fund kan ahensya.
Bilang paglilinaw ni National Electrification Administration (NEA) Administrator Antonio Mariano Almeda sa hapot ni Senador Erwin Tulfo manungod sa paglalaanan kan P7 bilyon, sinabi ni Almeda na an pondong ini ipapautang sa mga electric cooperatives (ECs) bilang panggastos sa mga kaipuhanan na kagamitan ninda.
Primerong katuyuhan kan lakdang na ini iyo an haleon sa bulanan na bayadan sa kuryente kan mga konsumidores an nawawarang kuryente o “system loss” na kawsa kan paghabon, tanganing magbaba na an gastos na haloy nang reklamo kan mga ini.
Huli ddigdi, dakula an linalaoman na magagamit na pondo kan mga kooperatiba para sa metering requirements, kaya kaipuhan na marhay na masukol an pondong kakaputan tanganing maareglo o maribayan an mga luma nang metro.
Bilang parte kan estriktong aksyon digdi, gabos na mayong metro o may ilegal na koneksyon puputulan, mantang aaregluhon asin lalagan nin bagong metro an gabos na konsumidor kaiba na an mga nadakop na nakajumper.
Tanganing masiguro na ini epektibo, nababanga sa apat na phase an programa; sa Phase 1, babawasan an 25% non-technical loss na nagkakahalaga nin P4 bilyon sa capital expenditure, mantang sa Phase 2 man babawasan an nasa 50% na may P1 bilyon.
Mientrastanto, sa Phase 3 maabot nin 75% na tinatayang nagkakahalaga nin P1 bilyon, asin sa huring Phase iyo an 100% o total elimination na nagkakahalaga man nin P1.5 bilyon.
Matatandaan na kan Setyembre 14, hinale man kan BIR an 12% Value-Added Tax (VAT) sa allowable system loss charge sa irarom kan Revenue Memorandum Circular No. 97-2026.
