Nag-apela si Philippine Coast Guard (PCG) spokesperson para sa West Philippine Sea Rear Adm. Jay Tarriela na dugangan an mga barko asin asset kan gobyerno tanganing mas maprotektaran an mga mangingisdang Pilipino sa solnopan na baybayon kan nasyon.
An nasabing apela nagluwas kasunod kan bagong insidente nin pambabangga kun sain tuyong binangga kan sarong China Coast Guard vessel an barko kan Bureau of Fisheries and Aquatic Resources (BFAR) mantang nagsasagibo nin resupply mission sa West Philippine Sea.
Segun ki Tarriela, kaipuhan kan nasyon an mas dakul na Coast Guard asin BFAR assets na maidedeploy tanganing regular na malibot asin mapatrolyahan an kabilugan kan pinag-aagawan na kadagatan.
Idinugang kan opisyal na an pagpadara nin mas dakulang convoy nin mga barko makakatabang tanganing maitaboy asin mas magharayo an mga Chinese vessel na padagos na nanghaharass sa mga Pilipino.
Apwera sa kadaklan kan mga patrol vessel, ipinahayag man kan pamayoan kan PCG an importanteng pangangaipo para sa mas darakula asin mas matitibay na barko tanganing matugunan an naglalaad na huma sa seguridad kan nasyon.
