Matao an Department of Migrant Workers (DMW) nin suporta ki Mary Jane Veloso, sarong dating overseas Filipino worker, kaiba an psychological asin livelihood assistance, matapos na tawan siya kan Malacañang nin absolute pardon.
Segun ki Palace Press Officer Undersecretary Claire Castro sa sarong press briefing, parte kan padagos na interbensyon kan DMW an pagtao nin psychosocial counseling, livelihood starter kits, kapital para sa pagnenegosyo, asin skills training.
Mantang, ipinagtao kan Department of Social Welfare and Development (DSWD) Field Office 3 an ₱30,000 cash assistance ki Veloso.
Nakakua man nin ₱10,000 an saiyang mga magurang, mantang ₱30,000 man an ipinagtao para sa saiyang mga aki.
Mainit man na sinabat si Veloso kan saiyang mga kaarak asin haraning amigo sa saiyang pagbalik sa Barangay Burol, makalihis an 16 na taon.
Naromdoman na hinusgaran kan District Court of Justice of Sleman sa Yogyakarta, Indonesia, si Veloso nin parusang kagadanan kan Oktubre 11, 2010.
Tolos man na nag-apela an dating Presidente Benigno Aquino III para sa saiya.
Iginiit ni Veloso na siya inosente asin dai niya aram na ginamit siya bilang tagadara nin ilegal na droga.
