Senate President Sherwin Gatchalian naglinaw na an desisyon na dai pagsubpoena ki dating Senador Antonio Trillanes IV para sa impeachment trial ni Vice President Sara Duterte, bakong sana desisyon ni Presiding Officer Francis “Chiz” Escudero.
Idinugang ni Gatchalian na kinonsulta nguna ni Escudero an mga senador-huwes kan impeachment court bago ini nagpaluwas nin siring na ruling.
Paliwanag niya, dakul na importanteng usapin sa paglilitis, kaiba an posibleng pagtestigo ni Trillanes, an enot na tinataram asin kinokonsulta sa mga senador-huwes bago magkaigwa nin pinal na desisyon.
Si Trillanes saro sa mga testigo na isinabay kan prosecution sa saindang manifestation para sa Article II, na nagtutukoy sa alegasyon nin “unexplained wealth.”
Nagpahayag na nin pagkadismaya si Trillanes kan nakaaging Biyernes huli ta dai siya natawan nin subpoena, asin sinabi niyang siya sana sa mga testigo kan prosecution para sa Article II an dai nakaresibi kan nasabing orden.
Alagad, lininaw ni Gatchalian na an kawaran nin subpoena hale sa impeachment court dai nangangahulugan na dai na pwedeng magtestigo si Trillanes.
Segun sa Senate President, pwedeng ipatawag kan prosecution panel si Trillanes kun gusto ninda gamiton an saiyang testimonya tanganing mapakusog an saindang kaso.
Giit pa ni Gatchalian, bukas an impeachment trial sa mga testigo na gustong iharap kan magkabilang panig, susog sa proseso kan paglilitis.
