Nagkarekod an Probinsya nin Camarines Sur nin 1.0 porsyentong pagbaba kan ekonomiya kan 2025.
Susog ki Raul P. Aspe Jr., an Chief Statistical Specialis kan PSA Camarines Sur, an pagbaba na ini kontra sa 5.0 porsyentong pagtalubo na naitala kan 2024.
Sa ibong kan pagbaba kan ekonomiya, pigkakarkulong nagkakantidad nin PhP 208.97 bilyon an total na Gross Domestic Product o GDP kan probinsya.
Alagad, apektado man an mga indibidwal na residentes huli ta buminagsak nin 1.9 porsyento an per capita GDP kan probinsya na nag-abot sa PhP 96,467 kada tawo.
Base sa pinaluwas na report, an mga pangenot na industriya iyo an mga nagtutulod kan pagluya kan ekonomiya.
Nagrerekod nin 17.0% pagbaba an konstruksyon.
Bumaba man nin 4.3% an agrikultura, pag-ooma asin pagsisira.
Bumaba nin 1.7% an manufacturing.
Nagrekod man nin 1.2% pagbaba an kuryente, tubig, asin pamamahala nin basura.
Sa ibong na lado, nagtalubo nin 13% an sektor nin salud nin tawo asin mga aktibidad sa social work, na nagrekord nin signipikanteng paglangkaw sa laog kan parehong taon.
