Nagsairarom an Barangay Concepcion Grande sa Barangay Council for the Protection of Children (BCPC) asin Child-Friendly Local Governance Audit (CFLGA) bilang parte kan ebalwasyon kan mga programa asin serbisyo na nakasentro sa kapakanan, proteksyon asin deretso kan mga kaakian.
Sa intrevista kan Bombo Radyo Naga kay Jerrold Rito, Barangay Captain, Barangay Concepcion Grande, Naga City, sinabi kaini na an city-level assessment ginibo poon alas 3:40 sagkod alas 5 nin hapon, kun saen an evaluation panel nagrepaso kan implementasyon kan barangay kan mga programa para sa mga kaakian, kabali an salud asin nutrisyon, edukasyon, proteksyon sa kaakian asin iba pang mga pundamental na serbisyo.
Pigheras, nagin positibo an enot na resulta kan ebalwasyon, dawa ngani igwa pang nagkapirang aspeto asin pasilidad na pwedeng pakarhayon pa. Kabale digdi an mga pasilidad kan mga barangay na presenteng pigsasairarom sa renovation o reconstruction, alagad pwedeng basehan an mga dokumento asin Means of Verification (MOVs) kan nakaaging taon.
Obheto kan ebalwasyon kan ciudad na makapili nin sarong barangay na magiging modelong barangay kan Ciudad nin Naga para sa nasyonal na ebalwasyon. Oras na mapili, ini maagi sa sarong nasyonal na proseso nin pagpili kun sain an mga nasyonal na ebalwador pwedeng random na magpili nin sarong barangay na dadalawon tanganing maseguro an implementasyon kan mga programa na para sa mga aki sa lokal na lebel.
Apwera sa pagmidbid, igwa nin ₱100,000 na proyekto o cash prize para sa napiling modelong barangay sa ciudad. Sa ibong kaini, pigduon kan evaluator na urog sa arin man na premyo, importante an padagos na implementasyon kan mga programa asin serbisyo tanganing maprotehiran an mga kaakian asin maseguro an saindang deretso asin proteksyon laban sa pang-aabuso.
