Pig-inagurahan an sarong bagong Rural Health Unit (RHU) an sa banwaan kan Minalabac, Camarines Sur, na may katuyuhan na mapalawig asin mairani sa mga residentes an mga basic health services.
Sa intrevista kan Bombo Radyo Naga ki Councilor Christopher Lizardo, sinaysay kaini na poco mas o menos 1,000 metro kwadrado an hiwas kan pasilidad asin igwa nin espasyo para sa posibleng pagpahiwas kaini sa 2,000 metro kwadrado. An katuyuhan iyo na madagdagan an bilang kan mga kwarto, pasilidad asin mga medical staff mantang nagdadakula an pangangaipo kan mga residente.
Kabali sa mga pigplanong serbisyo iyo an laboratory asin X-ray, kun saen piglalaoman na makukua an mga medical technologist na magmanehar kan mga kagamitan na itinatao sa nasabing pasilidad. Igwa man nin plano na magkaigwa nin dialysis center tanganing matabangan an mga pasyente na nangangaipo kan siring na serbisyo.
Sinabi man ni Lizardo na igwa nang inandam na pondo an lokal na gobyerno para sa mga kinakaipuhan na supplies asin kagamitan. Padagos man an koordinasyon sa Department of Health para sa dugang na suporta asin programa na makakatabang sa operasyon kan RHU.
Para sa mga emerhensya asin grabeng kaso na dae kaya kan RHU, irerefer sa ospital an mga pasyente. Naka-standby man an mga ambulansya para sa tulos na transportasyon kan mga pasyente na nangangaipo nin mas halangkaw na lebel nin medical care.
