Pig-asegyurar kan legal team ni Bise Presidente Sara Duterte na igwa sinda nin sadiring panig asin salaysay na ipapahayag manungod sa mga alegasyon nin “unexplained wealth” kun mag-abot na an saindang oportunidad na magpresentar nin ebidensya sa “Impeachment Trial”.
Segun ki defense spokesperson Atty. Michael Poa, tama sana na isipon kan publiko na an mga presenteng pinag-uurulayan asin nagluuluwas sa mga pagdangog nakabase pa sana sa panig kan prosekusyon.
Nagsayuma man si Poa na idetalye an mga usap-usapan manungod sa mga kredito, “credit card transactions”, asin an sinasabing mga transaksiyon sa ibang nasyon huli sa nag-eeksistir na sub judice rule na nagbabawal sa pagtalakay sa publiko kan mga merito kan kaso.
Ipinaliwanag kan hurista na bakong patas dawa sa prosekusyon kun iluluwas kan depensa an mga argumento asin detalye kan saindang panig bago pa man ini opisyal na maisumite sa “impeachment court”.
Dawa pa inako ni Poa na dehado an kampo kan Bise Presidente mantang naghahalat kan saiyang turno sa pagpresentar nin ebidensya, orog na sa sarong prosesong may makusog na kulay-pulitika, nagpapadanay sinda nin kumpiyansa na mapapabulaanan an mga ihinain laban saiya.
