Pig-asegurar kan Metro Naga Water District (MNWD) na nasa marhay na kondisyon an saindang mga fire hydrant asin preparado an saindang mga tawohan na magtabang sa Bureau of Fire Protection (BFP) enkaso magkaigwa nin kasulo.
Sa entrevista kan Bombo Radyo Naga ki Choppy Dy-Liacco Dela Cruz – Public Information Officer, Metropolitan Naga Water District, sinabi kaini napag-araman na kan saindang opisina asin kan BFP an mga fire hydrant na may supisyenteng presyon kan tubig, partikularmente sa CBD 1, CBD 2 asin iba pang matawong lugar sa Ciudad nin Naga.
Pig-eksplikar ni Dela- Cruz, na temporaryong isinara an nagkapirang hydrants ngani na maibitaran an dai awtorisadong pagkua nin tubig. Alagad, preparado an saindang mga personahe na buksan an mga ini kun kinakaipuhan para sa mga operasyon sa pag-apula nin kasulo.
Mientrastanto, padagos man an paggamit kan MNWD kan saindang mga water lorry para masimbagan an pangangaipo kan mga residentes na nakakaeksperyensya nin maluya o mayong supply nin tubig.
Sa ibong kan piglalaoman na epekto kan El Niño sa first quarter kan 2027, sinabi ni Dela- Cruz na normal pa man giraray an supply kan tubig sa presente. Padagos man an preparasyon kan etro Naga Water District para maseguro an padagos na serbisyo sa mga residente.
