Nag-eenkaminar an Technical Education and Skills Development Authority (TESDA) sa mga jovenes, Out-of-School-Youth asin mga naghahanap nin trabaho na aprobetsaran an libreng mga programa sa pagtraining asin scholarship para sa mas mahiwas na mga oportunidad sa trabaho asin kabuhayan.
Sa intrevista kan Bombo Radyo Naga ki Engr. Carlo C. Saldivar – Acting Registrar, Senior TESDA Specialist, Regional Training Center-Pili, sinabi kaini na depende sa programa an kwalipikasyon kan aplikante, asin may mga kurso ngani na nag-aako nin mga gradwado sa elementarya.
Kabali sa mga kurso na pwedeng pilion iyo an welding, automotive, asin electrical, na an katuyuhan iyo an pagpatalubo kan mga kakayahan kan mga trainees susog sa pangangaipo kan industriya.
Nakikipagkoordinar man an TESDA sa mga kumpanya tanganing matawan nin oportunidad nin trabaho an mga graduates, mantang an Department of Trade and Industry (DTI) nagtatabang sa mga gustong magpoon nin negosyo.
Katakod kaini, nangapudan si Saldivar sa publiko na dae matakot na mag-adal asin dagdagan an kakayahan sa paagi kan mga programa kan TESDA, na pwede na magdara nin trabaho o self-sufficiency.
