Nagpakusog an Camarines Sur National High School sa kampanya kaini para sa kasalbadohan kan mga estudyante sa paagi nin sarong komprehensibo asin classroom-based na pagtukdo, na sentro kan National School Safety Week.
An importanteng programa, na nagpoon kan Lunes, Oktobre 12, 2026, nagtapos kan Biyernes, Oktobre 16, 2026, na nagtao nin kritikal na kaaraman asin kakayahan sa mga estudyante sa paglikay sa peligro.
Sa intrevista kan Bombo Radyo Naga, ipinahayag ni Mr. Sulficio Alferez, an principal kan Camarines Sur National High School , na mas pinahigot ninda an pagpalaganap kan kaaraman sa seguridad bako sana sa laog kan eskwelahan kundi pati man sa komunidad.
An inisyatibong ini, na nagtutukdo sa paglikay asin pagprotekta sa sadiri, nagin posible sa pakikipagtabangan kan manlaen-laen na stakeholders, kaiba an mga magurang asin mga pulis.
Huli ta nasa instructional block pa an eskwelahan, limitado an mga aktibidad sa luwas kan classroom, na ginigibo sana pakatapos kan klase.
An ibang mga aktibidad, arog kan pagdetekta nin mga darang deadly weapon, nakaintegrar na sa laog kan klase tanganing seguradohon an kaligtasan kan gabos na nalaog sa eskwelahan.
Mientrasanto, ibinale man ninda an mental health awareness sa pagseselebrar kan National School Safety Week sa paagi kan programang “You for You,” kun sain nagtipon sinda nin mga representante hale sa kada year level.
Poon kan magbukas an klase, an kasalbadohan kan mga estudyante an nagin pinakaprayoridad kan eskelahan, na nagpapahiling kan saindang daing-untok na dedikasyon.
Bilang parte kan saindang mas mahigpit na seguridad, igwa sindang metal detector asin iba pang detector sa gate tanganing seguradohon na ligtas an paglaog asin pagluwas kan mga estudyante.
Nagpagiromdom man si Mr. Alferez sa mga magurang na an saindang responsibilidad bako sana sa pagtao nin balon sa mga aki. Importante na bantayan an saindang mga aki, hilingon an saindang mga gamit, asin tukduan nin marhay na mga bagay tanganing malikayan an paggibo nin ano man na maraot. Sa suporta asin paggiya kan mga magurang, nagtutubod an eskwelahan na mayong magigin problema asin mas magigin ligtas an kapalibutan para sa mga estudyante.
