Personal na nagbisita si Bise Presidente Sara Duterte sa mga pamilya kan mga biktima kan nangyaring insidente nin pamamaril sa Banga National High School tanganing magpaabot kan saiyang pakikidamay asin suporta.
Tinawan-duon kan bise presidente an importansya kan pagpatupad nin mas makusog na culture of security sa mga eskwelahan, kaiba an mas marhay na information-gathering tanganing tulos na matukoy asin malikayan an mga sitwasyon na nagpapeligro sa mga estudyante.
Iginiit pa niya na importante an magkaigwa nin mga paratukdo asin school personnel na madaling ranihan kan mga estudyante para sa tulos na giya, tabang, asin pagrehistro kan saindang mga kahaditan sa kaligtasan.
Mientrastanto, suway man na nagbisita sa nasabing eskwelahan si Department of the Interior and Local Government (DILG) Secretary Jonvic Remulla tanganing makipagpulong sa mga lokal na opisyal manungod sa mga lakdang na dapat ipatupad tanganing dai na giraray maulit an pamamaril.
Segun ki Remulla, tinututukan kan mga awtoridad an posibleng impluwensya kan sarong online community na konektado sa violent activities asin nagmungkahi man nin mas mahigot na regulasyon sa paggamit kan social media kan mga kaakian na edad 16 paibaba, pati na an marhay na pagtago asin pagkaigwa nin mga badil.
