Pigseselebrar kan Our Lady of Penafrañcia Parish an ika-53 taon kan pagmukna kaini sa paagi nin sarong selebrasyon na ginigibo kada taon sa huring Sabado asin Domingo kan bulan nin Oktubre.
Segun ki Alvin Delacruz, Vice-President of Parish Pastoral Council, sinabi kaini na nagpartisipar sa aktibidad an mga organisasyon, barangay, ministries asin Area Pastoral Councils na sakop kan parokya, partikularmente an mga komunidad sa Barangay Liboton, Peñafrancia asin San Felipe, siring man an mga subdibisyon asin iba pang grupo na aktibong naglilingkod sa simbahan.
Bilang parte kan selebrasyon, piggrupo an mga partisipante sa apat na grupo na may manlaen-laen na kolor—asul, lila, dilaw asin berde. An lambang grupo igwa nin kapartner na guardian asin padi na nakadestino na maggiya asin magkoordinar kan mga aktibidad.
Kabali sa mga gigibohon iyo an mga kawat sa laog asin luwas, mga presentasyon sa kultura, asin mga prusisyon kan mga imahen ni Ina kan Peñafrancia, kan San Jose asin Santiago. An Santa Misa, na nakatalaan alas 9 nin aga, saro sa mayor na parte kan selebrasyon. Pakatapos kan misa, ginigibo an pagpremyo sa mga nanggana sa patiribayan, na sinusundan nin fellowship asin iba pang aktibidades.
Segun sa parasaysay, an taonan na selebrasyon sarong pagkakataon para sa mga parokyano na makisumaro sa mga relihiyosong aktibidad, magkaigwa nin mas marhay na identidad asin mapakusog an pagkasararo kan mga komunidad.
Tinawan man niya nin duon na an aktibidad nagtatao nin pagkakataon para sa mga tawo hale sa manlaen-laen na barangay asin organisasyon na makipagkumpetensya, magkoordinar asin magpartisipar sa mga preparasyon para sa mga kawat asin contest.
Sa paagi kan selebrasyon, kan Our Lady of Penafrañcia Parish an padagos na pinapakusog an espiritu nin pagkasararo, orgulyo asin aktibong partisipasyon kan mga parokyano sa buhay kan simbahan.
