Nagpatanid an Office of Civil Defense (OCD) nguonian na Domingo manungod sa posibilidad nin pag-uran nin abo kasunod kan nairehistrong pagbuga nin abo hale sa Bulkang Mayon sa Albay bandang alas-5:19 nin hapon.
Sa sarong post sa Facebook, ibinahagi kan Philippine Institute of Volcanology and Seismology (PHIVOLCS) an pinadaling kua kan kamera na nagpapahiling kan nangyaring pagbuga nin abo hale sa bunganga sa alitoktok kan bulkan.
Segun sa ahensya, uminabot sa 300 metro hale sa bunganga sa alitoktok kan Bulkang Mayon an ibinugang abo bago ini tinangay kan duros pasiring sa norte-norte-subangan.
Naobserbaran an pangyayari sa mga kamera na naka-install sa Mayon Volcano Observatory sa Ligñon Hill, Mayon Rest House, asin Ligao Observation Station.
Segun sa PHIVOLCS, nagpapabilin sa Alert Level 2 an Bulkang Mayon. Mahigot man na ipinagbabawal an paglaog sa laog kan anom na kilometrong Permanent Danger Zone (PDZ) sa palibot kan bulkan huli sa padagos na peligro kan aktibidad kaini.
