Nag-aandam na an gobyerno kan ciudad tanganing masierto na preparado an lambang opisina asin barangay sa posibleng epekto kan labi-labing init asin kakulangan nin tubig.
Sa intrevista kan Bombo Radyo Naga ki Mayor Leni Robredo, sinabi kaini na dae pa nagdedeklara nin State of Calamity an Ciudad nin Naga huli sa El Niño, alagad padagos an paggibong mga lakdang kan lokal na gobyerno tanganing mag-andam sa posibleng paggrabe kan sitwasyon.
Nagpaluwas na nin Executive Order an ciudad na nagbubuo kan El Niño Task Force, kun saen nakabalangkas an mga trabaho asin responsibilidad kan lambang opisina sa City Hall.
Kan Biyernes, nagkaigwa man nin training para sa mga department heads para mas mapakusog an koordinasyon asin masiguro na malinaw an lambang opisina sa saindang kanya-kanyang assignment asin responsibilidad sa pagresponde sa epekto kan El Niño.
Kabale man sa mga preparasyon kan ciudad an pakikipagtabangan sa Waves for Water sa pagtugdok nin mga pasilidad na makakatabang sa pagtipig asin access kan tubig. An pinakaenot na rainwater catchment facility sa Barangay Sabang nakatalaan nang bendisyunan ngonian na aldaw.
Plano man kan gobyerno kan siyudad na palawakon an siring na mga proyekto sa ibang mga barangay, na kaipuhan an pag-alokar nin pondo gikan sa Gobyerno kan Ciudad tanganing mas dakol na komunidad an makikinabang.
Piglalaoman na posibleng magkusog pa an init sa mga masunod na bulan, partikular na sa Nobyembre, Pebrero o Marso. Tinawan-duon man an kahalagahan kan amay na pag-andam tanganing magin preparado an ciudad enkaso maggrabe pa an sitwasyon.
Sa ibong kan kawaran nin State of Calamity declaration manungod sa El Niño, padagos an pag-abante kan gobyerno kan ciudad sa pagplano, koordinasyon asin konkretong mga lakdang tanganing maprotehiran an mga Nagueño laban sa posibleng epekto kaini.
