Nag-iimplementar an Regional Apiculture Center kan Central Bicol State University of Agriculture (CBSUA) sa Pili, Camarines Sur nin mga lakdang tanganing maprotehiran an mga stingless bees sa tahaw kan nagbabagong kamugtakan kan panahon.
Sa intrevista kan Bombo Radyo Naga ki Johanna Cordial, Director kan Regional Apiculture Center, pigtawan-duon kaini an importansya kan tamang pag-ataman sa mga putyukan, urog na sa mga panahon nin labi-labing init asin paminsan-minsan na pag-uran na pwedeng makaapektar sa paghanap kan mgam ini nin pagkakan asin sa kamugtakan kan saindang mga kolonya.
Ipinaliwanag ni cordial na an mga putyukan na daing sugok importante sa polinasyon kan mga tinanom asin pananom, na nakakatabang na mamantenir an biodiversity asin mapakarhay an produksyon sa agrikultura.
Huli digdi, inabisuhan ni Cordial an mga paraoma asin BeeKeeper na likayan an paggamit nin pesticide na pwedeng makahilo o makaraot sa mga putyukan.
Importante man na ikonsiderar an kaligtasan kan mga parapolinasyon kun nagpipili asin naggagamit nin mga produkto sa pagkontrol nin peste, orog na sa mga lugar na harani sa mga pananom asin kun saen yaon an mga kolonya nin putyukan na mayong tusok.
An Regional Apiculture Center padagos na nagtutulod kan konserbasyon kan mga stingless bees tanganing mamantenir an saindang importanteng papel sa agrikultura asin kapalibutan.
