Padagos an pagbabantay kan manihamiento kan Naga City People’s Mall sa presyo kan karne, sira asin gulay sa tahaw kan supply challenges asin epekto kan El Niño.
Sa intrevista kan Bombo Radyo Naga ki Nephthali Pabines, Market Supervisor IV, MEPO, sinabi kaini na may mga produktong nahiling na nagbaba an presyo, mantang padagos na nagbabago an presyo kan mga barakalon depende sa tindahan asin lokasyon.
Dugang pa ni Pabines na an presyo nin orig nasa ₱240 sagkod ₱260 kada kilo. An mga presyo kan mga gulay, kaiba an repolyo asin sayote, nagbabago-bago man depende sa suplay asin kondisyon kan produksyon. Paliwanag ni Pabines, pwedeng maapektaran an supply kan gulay kun may problema sa patubig asin pananom.
Mientrastanto, saro sa mayor na isyu na pigtututukan kan manehamiento iyo an presensya kan mga ambulant vendors sa luwas kan merkado. Kabali sa mga pigkakahampang na problema iyo an pagbara kan mga pedestrian walkway, pagsunod sa mga regulasyon asin matanos na kompetisyon sa pag-ultanan kan mga paratinda na may permanenteng lokasyon asin mga nagtitinda sa luwas.
Segun ki Pabines, nakikipagkoordinar an market management sa Public Safety Office (PSO) asin sa kapulisan para masimbagan an mga reklamo asin mamantenir an orden sa palibot kan merkado. Idinoon man an pangangaipo na papagdanayon na malinaw an mga tinampo para sa kaligtasan asin kaginhawahan kan mga parabakal asin mga naglalakaw.
Katakod kaini, pinag-aadalan na an mga posibleng alternatibong lokasyon para sa mga ambulant vendors, huli haros okupado na an mga stall sa merkado. Nabanggit man an posibilidad na ma-renovate an pasilidad asin maghagad nin tabang sa gobyerno nasyonal para madagdagan an mga available na stalls. Katuyuhan kan mga lakdang na mamantenir an orden sa merkado mientras na pigkokonsiderar an kabuhayan kan mga paratinda asin an karahayan kan mga parabakal.
