Piglalaoman na maabot sa 1.25 milyong pasahero an madagsa sa Ninoy Aquino International Airport (NAIA) para sa pagromdom kan Undas, poon ngunyan na Oktubre 27 sagkod Nobyembre 4, susog sa New NAIA Infra Corp. (NNIC).
Tinantya na an Oktubre 30 an magigin pinaka-abala na aldaw sa paliparan kun sain piglalaoman na maabot sa 149,000 na biyahero an maagi sa mga terminal.
Para masiguro an kaayusan asin seguridad, madugang nin mga pulis sa mga laogan kan terminal, parking areas, asin mga lugar na sakayan asin babaan kan pasahero.
Magpapalakop man nin dugang na traffic marshals asin magtatao nin mga shuttle service sa pagultanan kan mga terminal para maayos na maproseso an pagdagsa kan mga dumarating asin naghahali na biyahero.
Apwera sa pakikipag-ugnayan sa mga awtoridad sa tinampo asin pag-adaptar kan operasyon kan mga taxi, magtatao man nin dugang na personahe sa mga checkpoint asin magbugtak nin mga standby technical team para sa marikas na pagresponde sa anuman na pasilidad kan paliparan.
Mientrastanto, segun man sa Civil Aviation Authority of the Philippines (CAAP), amay ninda nang napaghandaan an mga paliparan na sakop ninda.
Segun ki Bea Bernardo, CAAP public information officer, igo an saindang mga tawo asin operational man an gabos nindang mga pasilidad poon sa Luzon, Visayas asin Mindanao.
