Naghagad an Barangay Concepcion Pequeña sa Ciudad nin Naga nin dagdag na pwersa o augmentation force tanganing makatabang sa pagmantenir kan seguridad asin orden sa Undas commemoration ngonian na taon.
Sa intrevista kan Bombo Radyo Naga ki Clack Divizon, Committee on Environment Barangay Concepcion Pequeña, sinabi kaini na nagkaigwa na nin preliminary meetings an mga responsable bilang preparasyon sa Undas. Kabali sa mga pinag-oolayan iyo an mga lakdang ngani na masierto an kaligtasan kan mga namamanwaan na mabisita sa mga kamposanto asin iba pang lugar na piglalaoman na magutok an tawo.
Piglalaoman man an koordinasyon kan 7 barangay na imbwelto sa preparasyon, siring man an pakikipagtabangan sa Philippine National Police (PNP) asin Public Safety Office (PSO) para sa implementasyon kan mga lakdang sa seguridad.
Segun sa opisyal, sa pangkagabsan matuninong an sitwasyon sa lugar. Alagad kabale sa mga pigbabantayan iyo an pag-inom nin arak sa mga pampublikong lugar, na posibleng magkawsa nin inconvenience o problema sa orden.
Tinawan man nin duon an importansya kan pagtatarabangan kan barangay, mga awtoridad, asin iba pang mga nagkokooperar na grupo ngani na magin mahiwas asin ligtas an pagrumdom kan Undas.
Padagos an ginigibong preparasyon kan mga otoridad ngani na masiguro an orden asin kaligtasan kan publiko sa pagbisita sa nagadan na mag mahal sa buhay.
