Labi sa 100 na volunteers na an nakisumaro sa Philippine Red Cross-Camarines Sur Chapter ngonian na taon, kun saen padagos na pinapakusog an programa kan Red Cross 143 (RC143) tanganing mapadali an pagresponde sa mga komunidad, orog na sa panahon nin mga kalamidad.
Sa intrevista kan Bombo Radyo Naga ki Maria Felisa Badiola ,Chapter Administrator, Philippine Red Cross-Camarines Sur Chapter, sinabi kaina na an katuyuhan, kwalipikasyon asin papel kan RC143 sa komunidad na an RC143 sarong programa na target na magkaigwa nin mga volunteers sa mga komunidad na maserbing katuwang kan Red Cross sa pagmonitor asin pagreport kan mga pangyayari, partikularmente sa mga lugar na delikado o madaling apektado nin mga kalamidad.
An mga gustong magin mga boluntaryo sa RC143 kaipuhan na magin andam sa pisikal asin mental para sa mga angat, asin magkaigwa nin pundamental na oryentasyon sa pagboluntaryo. Magsasairarom man an mga ini sa training sa first aid asin tamang pagreport kan mga insidente.
Dugang pa kaini, an programa bukas sa mga indibidwal hale sa gabos na sektor kan komunidad, asin dae limitado sa mga may kaaraman sa medisina. Kabali sa mga pwedeng magboluntaryo iyo an mga residente sa mga lugar na harani sa salog, tulay, asin mga lugar na may peligro sa pagrasay kan daga.
Mientrastanto, nagpaluwas man nin kahagadan si Badiola laban sa mga indibidwal o organisasyon na dae awtorisadong maggamit kan pangaran asin simbolo kan Red Cross, partikularmente sa pagkondusir nin mga training.
Pigpagirumdom kaini na sa irarom kan Republic Act No. 10530 o Red Cross and Other Emblems Act of 2013, may mga penalidad sa dae awtorisadong paggamit nin mga emblema asin pag-claim na representante kan organisasyon.
Inabisuhan man kaini an publiko na kumpirmahon muna sa opisina kan Red Cross an awtorisasyon kan mga nag-oopresir nin training, asin siguraduhon na igwa nin opisyal na sertipiko asin resibo para sa mga transaksyon.
