Kampante an Department of Agriculture (DA) sa kasapatan kan suplay nin pagkakan sa bilog na nasyon, sa ibong kan padagos na pagluya kan piso kontra dolyar asin iba pang foreign currencies.
Naromdoman na ngunyan na semana, tuluyang naglangkaw sa sobra P64 an sarong dolyar alagad medyo nakabawi man sa pagtatapos kan trading ngunyan na Biyernes, Oct. 30.
Segun ki DA Spokesperson Assistant Secretary Arnel De Mesa, sapat an imbak kan nasyon sa mga pangenot na produkto sagkod sa pagtatapos kan taon 2026.
Ini parehong hale sa suporta kan mga lokal na parauma asin hale sa mga imported o inangkat na produkto hali sa manlaen-laen na nasyon.
Dugang pa ni De Mesa, tama sana an naenot nang sinabi ni Pangulong Ferdinand R. Marcos Jr. na “hindi kailangang mag-panic dahil sapat ang suplay ng pagkain para sa lahat.”
Kaiba kan presenteng administrasyon, aniya, ginigibo man kan DA an gabos na paagi tanganing salagan an epekto kan pagluya kan piso kontra dolyar.
Sa ngunyan, naghahanda man an DA nin mga itataong tabang sa mga lokal na parauma na labi-labing maaapektaran kan epekto kaini, asin kan iba pang presenteng problema arog kan nagtitios na El Nino phenomenon.
