Nagbabala an Department of Agriculture (DA) manungod sa posibleng paglangkaw kan presyo kan paroy asin iba pang produktong agrikultural kasunod kan padagos na pagluya kan piso kontra dolyar.
Segun ki DA Spokesperson Arnel de Mesa, huli sa maluya na piso, mas dakula an gastos sa pag-angkat kan mga produkto arog kan paroy asin pataba na ginagamit sa pagtanom.
Posible man na maglangkaw an presyo kan paroy sa Nobyembre asin Disyembre huli sa inaasahang epekto kan El Niño.
Pig-asegurarkan DA na igwa nin supisyenteng suplay kan mga pangenot na kakanon sa nasyon sagkod sa katapusan kan taon.
Sa datos kan ahensya, umabot na sa 4.36 million metric tons an naangkat na paroy sagkod kan Oktubre 22.
Mantang, naglangkaw sa ₱64.18 kontra sarong dolyar an halaga kan piso na nairehistro kan Miyerkules, Oktubre 28, na bagong pinakahababang lebel kaini.
Naenot nang sinabi ni Presidente Ferdinand Marcos Jr., na mayo nin rason para mag-panic sa ibong kan pagbagsak kan halaga kan piso.
Sinang-ayunan man ini kan DA asin pigatawan-duon na supisyente an suplay kan kakanon sa nasyon.
