Nagkundusir na nin inspeksiyon sa mga camposanto an Bureau of Fire Protection (BFP) Magarao bilang pagpreparar sa pagdagsa kan mga bisita ngunyan na Undas.Segun sa BFP Magarao, presente nang iniinspeksiyon kan saindang mga fire safety inspector an duwang sementeryo sa banwaan kan Magarawo na parehong yaon sa San Isidro asin Poblacion, siring man an mga sementeryo sa Santa Lucia.
Kabali sa saindang sinusuri an kaligtasan kan mga pasilidad, partikular an tama asin marhay na pagkakakabit kan mga ilaw asin linya nin kuryente.Makikipagkoordinar man an BFP sa opisina kan insurance asin General Services Office kan lokal na gobyerno tanganing masiguro na ligtas an mga installed elektrikal.
Nagpapanao man sinda nin mga post card sa mga naglilinig kan sementeryo tanganing magtao nin importanteng mga pagirumdom asin giya sa pagpreparar para sa pagromdom kan Araw ng mga Santo asin Araw ng mga Kaluluwa.
Dadagdagan an bilang kan mga nakatalagang personnel sa Nobyembre 1 asin 2 tanganing masiguro an kaligtasan kan mga madagsang bisita, kaiba an mga hale sa kataraid na banwaan.Inatasan man kan pamunuan an mga personnel na mayo sa regular na duty na magtabang sa operasyon tanganing mapano an kakulangan sa tauhan asin masiguro an supisyenteng seguridad sa mga sementeryo.
Nagsagibo na man nin inisyal na pagtiripon an BFP dapit sa mga nakatalaan na aktibidad.Nakikipagkoordinar man sinda sa Philippine National Police (PNP), Municipal Disaster Risk Reduction and Management Office (MDRRMO), asin iba pang ahensya para sa koordinasyon kan mga lakdang pangkaligtasan sa Undas.
Kaugnay kaini, pinapaalalahanan kan BFP an publiko na seguraduhon na nakapundo an gabos na panginot na switch asin circuit breaker bago humali sa harong tanganing malikayan an kalayo.
Inaabisuhan an publiko na halion sa saksakan an mga bakong kaipuhanan na kagamitang de-kuryente, arog kan mga ilaw asin charger, bago magduman sa sementeryo.
Sa mga mabisita man sa mga puntod kan saindang namomotan, mahigot na ipinapayo an maingat na paggamit nin kandila asin paglikay sa mga bagay na madaling magkalayo tanganing malikayan an ano man na insidente nin kalayo.
Dugang pa kan BFP, importante na seguraduhon an seguridad kan mga harong bago maghali, orog na ngunyan na Undas, tanganing malikayan bako sana an kasulo kundi pati an iba pang posibleng insidente.Padagos an pangapodan kan BFP Magarawo sa publiko na pairalon an pag-iingat asin disiplina tanganing magin ligtas asin matuninong an pagromdom sa Undas.
