Nagdadanay na sapat asin padagos an suplay nin mga prutas sa merkado sa ibong kan paglaog kan Ber Months, an nagdadangadang na Undas, asin an huma kan Super El Niño, .
Sa intrevista kan Bombo Radyo Naga ki Ma’am Malaine Mayao, sarong tindera nin prutas, dai man na gayong matumal an bentahan huli ta padagos pa man giraray an pag-abot kan mga parabakal asin regular na suki.
Alagad, namamati an paglangkaw kan presyo nin mangga huli sa kakulangan kan suplay kaini.Segun saiya, igwa nin nagkapirang kostumer na naghahapot asin nagrereklamo huli sa halangkaw na presyo kan mangga.
Nilalaoman man na magdadanay na halangkaw an presyo kaini sagkod Disyembre o magin lampas pa sa Ber Months sagkod na dai nagbabalik sa normal an suplay.
Dugang pa kaini, pag-abot sa Undas, medyo nababawasan an bilang kan mga nagbakal nin prutas huli ta mas nakatutok nguna an nagkapirang mamimili sa pagbakal nin mga burak para sa pagromdom kan saindang mga nagadan na namomotan sa buhay.
Mientrastanto, dai man ini gayong nababahala sa posibleng epekto kan Super El Niño huli ta padagos pa man giraray an pag-abot kan saindang mga paninda hale sa manlaen-laen na lugar.
Kaiba an mga prutas na hale sa Davao asin Maynila, siring man an mga lokal asin imported na produkto.
An iba sa mga ini iyo an lansones asin mangosteen na kinukua pa hale sa saindang mga supplier sa Davao.
Sa ibong kan mga hamon na dara kan pabago-bagong panahon, nilalaoman kan mga nagtitinda na magpapadagos an sapat na suplay asin bentahan kan mga prutas basta’t padagos an saindang ugnayan sa mga supplier asin nagdadanay na marhay an pag-abot kan saindang mga paninda.
