Naghiras sarong OFW sa Romania, kan mga pagkakapareho asin pagkakaiba sa pag-obserbar kan All Saints’ Day sa Romania asin sa Pilipinas.
Sa entrevista kan Bombo Radyo Naga ki Pamela Joy Bernales, Bombo International News Correspondent in Romania, sinabi kaini na haros magkapareho an mga tradisyon sa duwang nasyon kun saen an mga pamilya nagbibisita sa mga kamposanto, nag-aalok nin burak, nagsisindi nin kandila asin namimibi para sa saindang mga nagadan nang mahal sa buhay.
An nagkapira sa mga pambihirang tradisyon kan mga Romano kabali an pagdara nin mga prutas, mani asin an saindang espesyal na putahe na mga rolyo nin repolyo na kompuesto nin bagas asin karne na pinatos sa dahon nin repolyo. Inaapod man ninda na “Iluminasyon” an pagromdom kan mga nagadan sa Nobyembre 1.
Mientrastanto, sinabi man ni Bernales na igwang mga pamilyang Romaniano na nagtatao nin oras sa pagbisita sa mga kamposanto, mantang an iba pinipili na magbakasyon o mag-family outing. Igwa man nin mga Pinoy na OFW na padagos na nagtatrabaho sa ibong kan okasyon.
Tinawan nin duon ni Bernales an kahalagahan kan pagtao nin halaga sa pamilya asin mga mahal sa buhay, orog na an mga nagtatrabaho sa abroad. Pig-engganyar man kaini an mga kapwa OFW na atamanon an saindang salud asin dae pag-abusohon an sadiri sa trabaho.
