Matoninong asin areglado an pag-obserbar kan All Saint’s Day sa manlaen-laen na kamposanto sa Ciudad nin Naga, base sa assessment kan Incident Management Team (IMT), sa ibong kan pagdagsa nin mga tawo na nagbibisita sa pantyong kan saindang nagadan na mga mahal sa buhay.
Sa intrevista kan Bombo Radyo Naga Raynor Rodriguez, Head, City Disaster Risk Reduction and Management Office (CDRRMO), sinabi kaini na labi sa 200 na personahes an na-assign kan IMT para masierto an seguridad kan publiko, malinaw an dalagan kan trapiko asin tulos na pagresponde sa mga posibleng insidente. Mayo nin nairehistrong seryosong insidente sa palibot kan mga kamposanto kan Nobyembre 1, dawa ngani igwa nin nagkapirang menor de edad na lugad na nangangaipo nin atensyon medikal.
Kabali sa mga mayor na agyat sa operasyon iyo an paggutok kan trapiko, paglaog kan mga behikulo sa one-way streets asin kawaran nin disiplina kan nagkapirang motorista asin pedestrians. Alagad, sinabi ni Rodriguez na manageable an sitwasyon asin sa pangkagabsan matoninong an pag-obserbar kan Undas.
Bilang parte kan mga rekomendasyon para sa mga masunod na mayor na aktibidad sa ciudad, pigduon ni Rodriguez an pangangaipo para sa mas amay na pagpaluwas nin mga memorandum, mas marhay na koordinasyon sa mga ahensya arog kan PNP asin BFP, asin padagos na training sa Incident Command System (ICS). Pigsuherir man kaini na pakusugon an presensya kan mga responders sa mga lugar na nangangaipo nin seguridad asin tulos na tabang.
Mientrastanto, nagbaba an bilang kan mga nagbibisita sa mga kamposanto pag-abot kan aga kan Nobyembre 2, kun kaya luway-luway nang nagbabalik sa normal an pagdeploy nin mga personahes. Sa ibong kaini, mantenidong naka-standby an mga responders para masierto an kaligtasan kan publiko. Inenkaminar man ni Rodriguez an gabos na padagos na magmantenir nin disiplina asin kooperasyon ngani na mamantinir an kaayusan sa maabot na selebrasyon kan Undas.
