Nakatalaan na pag-olayan kan Sangguniang Panlungsod kan Naga an kahagadan para sa paghale kan State of Calamity na pigdeklarar sa ciudad huli sa dengue, kasunod kan pagbaba kan bilang kan mga naikurit na kaso.
Sa intrevista kan Bombo Radyo Naga Raynor Rodriguez, Head, City Disaster Risk Reduction and Management Office (CDRRMO), nagbaba na sa mababa sa 10 kaso kada morbidity week an nairehistrong kaso nin dengue base sa pinakahuring report kan ciudad. Sinabi niya na dawa ngani dae pa lubos na nawawara an helang, dakula an pagbaba kan numero kumpara sa peak kan outbreak kun saen uminabot na sa ginatos na kaso.
Sinabi ni Rodriguez na pig-aadalan na kan City Disaster Risk Reduction and Management Council (CDRRMC) an kahagadan sa gobyerno probinsyal na haleon an deklarasyon kan State of Calamity. Ini piglalaoman na pag-oolayan sa sesyon kan Sangguniang Panlungsod kun sain an rekomendasyon maagi sa magkakanigong proseso nin pag-aprobar.
Pigduon ni Rodriguez na an paghale kan State of Calamity dae nangangahulugan na mapundo na an kampanya laban sa dengue. Padagos an surveillance sa mga barangay, Dengue Fast Lane, screening asin monitoring sa paagi kan City Health Office asin Barangay Health Workers. Alagad, babawasan an mahiwas na pagdeploy nin dagdag na personahes asin an paggamit kan Quick Response Fund (QRF), tanganing mapreserbar an pondo para sa posibleng iba pang kalamidad asin emerhensya.
Inenkaminar man ni Rodriguez an mga residente na ipadagos an paglinig asin pag-inspeksyon kan saindang mga harong, partikularmente an mga container asin mga bagay na pwedesir na istaran nin mga namok arog kan mga balde, kaldero asin iba pang natipon na tubig-uran. Importante suboot an padagos na pagtatarabangan kan lambang pamilya asin barangay ngani na maibitaran an saro pang paglangkaw kan kaso, urog na piglalaoman an posibleng paglangkaw sa Nobyembre asin Disyembre base sa dating trend kan helang.
