Uminabot na sa ₱19.66 trilyon an kabilugan na utang kan nasyunal na gobyerno kan Pilipinas sa pagtapos kan Setyembre, huli sa padagos na pag-utang kan gobyerno asin paghina kan halaga kan piso kontra sa dolyar.
Base sa report, naglangkaw nin 0.27 porsiyento o katumbas nin ₱53.47 bilyon an kabilugan na utang kan nasyon hale sa ₱19.61 trilyon kan pagtapos kan Agosto.
An domestic debt an nagbibilog kan pinakadakulang parte kan kabilugan na pagkakautang kan nasyon na nagkakahalaga nin ₱13.25 trilyon, katumbas nin 67.39 porsiyento kan kabilugan na utang. Naglangkaw ini nin 0.07 porsiyento kumpara kan Agosto, huli sa ₱7.66 bilyon na pagluwas kan government securities asin ₱1.12 bilyon na paglangkaw sa halaga kan mga dollar bond na nakalakal sa laog kan nasyon. Sa kabilugan, naglangkaw na nin 9.34 porsiyento an domestic debt poon kan 2025.
Mantang, uminabot man sa ₱6.41 trilyon an external debt, na nagbibilog sa 32.61 porsiyento kan kabilugan na utang kan gobyerno. Naglangkaw ini nin 0.7 porsiyento poon Agosto, pangenot huli sa ₱40.12 bilyon na paglangkaw kan halaga kan mga obligasyong panluwas bunga kan pagluya kan piso kontra sa dolyar, siring man sa ₱9.27 bilyon na bagong pag-utang hale sa mga dayuhang nagpapautang.
Nairehistro man an pagluya kan piso matapos magsara an palitan kaini sa ₱62.60 kada dolyar kan pagtapos kan Setyembre, hale sa ₱62.209 kan Agosto. Alagad nabawasan man an paglangkaw kan external debt huli sa ₱4.7 bilyon na pagbaba kan halaga kaini bunga kan paborableng paghiro kan iba pang dayuhang kwarta kontra sa dolyar. Sa kabilugan, naglangkaw na nin 14.67 porsiyento an external debt poon kan pagtapos kan 2025.
Padagos na nag-uutang an gobyerno tanganing pondohan an darakulang proyektong pang-imprastraktura asin mga programang panlipunan na an katuyuhan iyo an maibsan an epekto kan naglalangkaw na presyo kan mga bakalon, partikular sa mga pobre asin mas nangangaipong sektor kan sosyedad.
