Dai makakaapektar an pagsayuma ni Dean Ralph Sarmiento na magtestigo sa estratehiya kan depensa sa impeachment trial ni Bise Presidente Sara Duterte
Sa entrevista kan Bombo Radyo Naga ki Atty. Benjamin Guillermo B. Magadia, Law Professor, sinabi kaini na naiintindihan niya an desisyon ni Sarmiento na dae magtestigo tanganing mamantenir an saiyang independencia asin imparciality bilang sarong propesor kan constitutional law. Mas maray suboot na magdanay siyang neutral asin pabayaan na an mga ebidensiyang iprinesentar sa pagbista an magin basehan sa pag-analisar.
Ipinaliwanag ni Magadia na posibleng nakatutok sana sa academic interpretation kan probisyon kan Constitution asin sa proseso kan impeachment an testimonya kan mga legal experts. Alagad, kun an sarong testigo may relasyon sa mga transaksyon o negosyo na pig-uulayan, pwedeng magkaigwa siya nin ibang papel sa pagbista.
Dugang pa kan abogado, importante para sa depensa na magpresentar nin paper trail o documentary evidence na iyo an magpapaliwanag kan ginikanan asin pagtalubo kan soboot yaman kan bise presidente. Kabali digdi an mga rekord hale sa mga bangko, accountant, city assessor, asin mga representante kan korporasyon na makakatabang na madeterminaran an lehitimong ginikanan kan mga pagsadiri asin pondo.
Tinawan duon man ni Magadia na importante na an impeachment trial dapat basado sa konkretong ebidensya asin bako sa espekulasyon o pampublikong pahayag. Katakod kaini, piglalaoman na magiging importanteng parte an mga dokumento asin testimonio kan mga testigo sa pagpapadagos kan pagbista sa Nobyembre 9 tangani na ma-assess an mga alegasyon manungod sa soboot dae maipaliwanag na yaman ni Duterte.
