Pigpapakusog kan Naga City Operatives for Basic Rescue of Wild Animals (NAGA COBRA) an mga lakdang para sa proteksyon asin konserbasyon kan mga layas na hayop sa ciudad nin Naga, sa paagi kan mga wildlife rescue operations, pagmonitor kontra sa illegal wildlife trade, asin pagpagirumdom sa publiko manungod sa importansya kan pagpreserbar kan natural na istaran.
Sa entrevista kan Bombo Radyo Naga ki Raymund D. Dela Cruz, Team Leader, Naga City Operatives for Basic Rescue of Wild Animals, sinaysay kaini na an target kan grupo iyo na makaresponde sa mga report dapit sa mga halas sa laog nin 15 hasta 20 minutos, depende sa distansya kan barangay. Ipinaliwanag man kaini na kabale sa mga mayor na huma sa mga hayop iyo an pagkakalbo kan mga gurang, pagkaraot kan natural na istaran, asin an pagpahiwas kan mga residensyal na lugar sa mga dating paroyan asin kalamakan.
Pigtukdo man ni De la Cruz an pagdakol kan mga invasive alien species sa Salog Naga, arog kan janitor fish, pangasius asin African catfish, na nakakaapektar sa mga native species nin sira. Kabali man sa mandato kan grupo an pagbantay sa iligal na wildlife trade asin pagsuporta sa implementasyon kan Republic Act 9147 o Wildlife Resources Conservation and Protection Act.
Aminado man an team leader na saro sa pigkakahampang na angat kan grupo iyo an kakulangan nin manpower, kun saen siya an nagreresponde sa mga snake alert durante kan Lunes hasta Biyernes. Bilang solusyon, plano kan opisina na mag-apply nin iba pang personahes bilang Wildlife Enforcement Officers sa Department of Environment and Natural Resources (DENR) tangani na mas mapakusog pa an implementasyon kan mga programa para sa proteksyon kan wildlife.
Nangapudan si de la Cruz sa publiko na bako sanang gadanon an mga halas na nasusumpongan sa mga harong asin komunidad, kundi isumbong sa mga nanonongdan para sa ligtas na rescue operation. Idinoon niya na an mga halas igwa nin importanteng papel sa natural na pagkontrol kan peste asin pagmantenir kan balanse kan kadena nin kakanon.
